معاك مول الجيلي الصفر AKA متمرد

 

مول الجيلي الصفر

مول الجيلي الصفر يتمرد بعد ما غير لون الجيلي إلى اللون البرتقالي و كاين فيهم لي مشا بعيد اصبح يلبس لباس عادي بلا جيلي زعما جارديان سيفيل. التمرد جاب معاه عجاجتو ، مول الجيلي الصفر اصبح من أصحاب قطاع الطرق كيعترض سبيل المواطنين ،كلهم كي دخلوك بنفس الطريقة  ، خلص فلوس باش تقد تحط طوموبيلتك هنا، خلص فلوس باش نخليك تمشي فحالك ، كاين نوع آخر لي كيجيك من الجانب العاطفي، "خويا تعاون معايا". وجميعهم عندهم رخص زعما قانونيين !!

متمرد

قصص كثيرة كنعيشها مع المتمردين ديال قطاع الطرق أصحاب الجيليات الصفرين، فمثلا باش نحط طوموبيلتي قريب الخدمة خصني نتفاهم مع المتمرد ونتهلا فيه مزيان باش يخلي ليا بلاصة ، اذا بغيت نبدل لبلاصة أخرى تكون قريبة لخدمتي كنصادف تمرد من نوع آخر،  مول الجيلي الصفر كيطالب بخلصة أسبوعية على اقل تقدير ، او كيجيك فاص كيبغي الخلاص  شهريا باش تستافد من حقك الشرعي  فالصطاسيونمون. 

أما المعاناة اليومية معاهم فحدث ولا حرج، تبغي تدوز المخبزة تاخد خبزة بدرهم وعشرين خاصك تخلص عليها درهمين ديال العشور ديوانة من شكل آخر، بلا مانساو باردين الكتاف المتمردين لي كتلقاهم حدا مرجان، بيم و كارفور والمراكز التجارية الصغرى والكبرى، زعما عطيني حقي من التقدية. 

باردين الكتاف

أما المتمردين اصحاب الاقتطاع من الدخل لي كتصادفهم بالقرب من الأبناك ، تخرج مائة درهم على أقل تقدير ، المتمرد خصو يستافد من 2% فما فوق . بلا منساو المتمرد vip تلقاه فجل المناطق السياحية ، و الطريفة كتبدى من 10dh لفوق ، إذا بغيتي مثلا تشم ريحة البحر وتستمتع بالجو خاصك تخلص عليها التسعيرة المحددة ، عاد صحاب الباريير و مستعمري الباركينغ المجاني لكيفرضو فيه قوانينهم الخاصة .وطبعا حتى بيوت الله لم يسلمو من قطاع الطرق ، خصوصا فرمضان و المناسبات الدينية ،المتمرد فالصباح التركيز ديالو على المخبزات و في الليل التراويح مع المصلين كيمص دمهم باش باخد الأجر والتواب.

كاين واحد النوع ديال بوصفير أشد تمردا ، كيطالب بمفاتيح السيارة باش يلعب بيها و يكرفصها كيف مابغا ، وشحال من بوصفير فالصيف كيدير القيلولة فطموبيلتك مخدم الكليماتيزور بكل أريحية. كاين  المتمرد من نوع آخر لي طور الخدمات ديالو ولا يطلب منك يغسليك طموبيلتك بماء متسخ وتخلصو بثمن الافاج. والامثلة لا تعد ولا تحصى!!

#متحضيش_طوموبيلتي

إذن حان الوقت نقولو لبوصفير المتمرد بارد الكتاف ماتحضيش طموبيلتي، ومن حقي نحط طموبيلتي فين ما بغيت ، وحان الوقت لتطهير المدن من بلطجية مول الجيلي الصفر ، كلنا هاشتاج متحضيش طموبيلتي ومجانية الصطاسيونمون حق كل مواطن.

#متحضيش_طوموبيلتي
#متحضيش_طوموبيلتي
#متحضيش_طوموبيلتي

بوسكورة24

إرسال تعليق

أحدث أقدم

نموذج الاتصال